Posibleng makasinati og drought o grabeng pagkauga sa yuta ang 11 ka probinsya ug usa ka dakbayan sa Southern Luzon, Visayas ug Mindanao sa dili pa matapos ang Nobyembre, sumala sa Philippine Atmospheric, Geophysical and Astronomical Services Administration o PAGASA.
Lakip sa mga lugar nga posibleng maapektuhan ang Albay, Camarines Norte, Camarines Sur, Catanduanes, Capiz, Negros Oriental, Leyte, Samar, Siquijor, Southern Leyte, Isabela City sa Basilan ug Misamis Oriental.
Samtang, 57 ka lugar ang posibleng makasinati og dry spell o pipila ka bulan nga kakulang sa ulan, samtang 11 ka lugar ang gilauman nga makasinati og dry condition.
Gipasabot sa PAGASA nga matawag nga drought kung mokunhod og kapin sa 60 porsiyento ang gidaghanon sa ulan sulod sa tulo ka sunod-sunod nga bulan, o mokunhod og labing menos 20 porsiyento sulod sa lima ka sunod-sunod nga bulan.
Ang dry spell nagpasabot sa ubos sa normal nga pag-ulan sulod sa tulo ka sunod-sunod nga bulan, samtang ang dry condition mao ang duha ka bulan nga mas gamay ang ulan kumpara sa naandang gidaghanon.
Gilangkit ang gipaabot nga kakulang sa ulan sa nagpadayon nga kusog hangtod hilabihan kakusog nga El Niño sa Pacific Ocean, nga gilauman nga moabot sa kinatumyan niini sa Disyembre ug posibleng magpadayon hangtod sa unang katunga sa 2027.
Tungod niini, gilauman usab nga mas gamay ang ulan sa dakong bahin sa nasud karong Nobyembre, hinungdan nga padayon nga gibantayan sa PAGASA ang posibleng epekto niini sa suplay sa tubig ug sektor sa agrikultura.
