Gipaabot sa umaabot nga semana ang managlahing lihok sa presyo sa mga produktong petrolyo, diin posibleng moubos ang diesel og P0.80 hangtod P1.00, kerosene og P1.50 hangtod P2.00 matag litro, samtang mosaka ang gasolina og P2.00 hangtod P2.20 matag litro.
Base sa datos sa Mean of Platts Singapore ug foreign exchange rates, ang rollback sa diesel gilangkit sa pagdaghan sa suplay gikan sa China ug Russia, samtang nagpabiling hugot ang suplay sa gasolina sa merkado sa Asya.
Gilauman nga ipahibalo sa mga kompanya sa lana ang opisyal nga pag-adjust sa presyo karong Lunes ug ipatuman kini sa Martes. Sa miaging semana, misaka og P1.20 ang diesel ug P0.50 ang kerosene, samtang miubos og P0.30 ang gasolina.
Kini na ang ika-43 nga pag-usab sa presyo karong tuiga, nga miresulta sa kinatibuk-an niining pagsaka og P68.55 sa gasolina, P65.63 sa diesel ug P63.26 sa kerosene matag litro.
