Giawhag sa Australian Red Cross ang mga residente sa Australia nga magtipig og mga importanteng suplay o essential goods isip pagpangandam sa posibleng mga emerhensiya, lakip na ang mga natural nga kalamidad ug uban pang hulga sa seguridad.
Matod ni Denmark Suede, Bombo International Correspondent sa Australia, ang maong panawagan alang sa pagpangandam sa bushfire season.
Gipasabot ni Suede nga dili bag-o sa Australia ang grabeng sunog sa kalasangan, ilabina sa nahitabong dagkong sunog niadtong 2019 nga milungtad sulod sa daghang bulan ug nakaapekto sa daghang bahin sa nasud.
Dugang pa niya, dili lamang natural nga kalamidad ang angayng andaman sa matag nasud, kondili lakip usab ang posibleng cyberattack nga mahimong makapahinabo og dakong kadaot sa mga sistema sa bangko, suplay sa kuryente ug uban pang importanteng imprastraktura.
Iyang gihisgotan nga kabahin usab sa mga gikonsiderar nga risgo sa mga nasud sa Kasadpan ang posibleng pagpalapad sa gubat sa Europe, lakip ang posibilidad nga molapas sa utlanan sa Ukraine ang agresyon sa Russia, ingon man ang kagubot ug cyberattack sa nagkadaiyang nasud.
Matod pa ni Suede, posible nga mahitabo ang maong mga sitwasyon sa bisan unsang nasud, samtang adunay mga impormasyon ug pagtimbang-timbang ang mga intelligence services sa mga nasud sa Kasadpan nga wala pa ipahibalo sa publiko.
