Nangayo og pasaylo si Hong Kong leader John Lee sa mga residente nga naapektuhan sa dakong sunog sa Wang Fuk Court residential complex sa distrito sa Tai Po, usa ka tuig human nahitabo ang trahedya.
Sa iyang press conference, gipagawas usab ni Lee ang mga taho kalabot sa upat ka departamento sa gobyerno nga giingong adunay responsibilidad sa pagdumala sa mga reklamo bahin sa kaluwasan sa maong mga bilding.
Lakip sa mga repormang ipatuman sa Hong Kong government ang paghugot sa mga lagda sa kaluwasan ug pagdumala sa industriya sa konstruksyon, lakip ang regular nga inspeksyon sa mga bilding.
Matud ni Lee, dako ang iyang pagmahay sa nahitabong trahedya ug nangayo siya og pasaylo sa tanang residente ug miyembro sa publiko nga naapektuhan niini.
Mikabat sa halos 168 ka tawo ang namatay sa sunog nga mikatap sa pito ka 31-storey nga building sa Wang Fuk Court, diin naapektuhan usab ang mga bilding nga giayo niadtong panahona tungod sa scaffolding ug protective netting nga nasunog.
Samtang, mipahibalo usab si Lee sa pagbiya sa puwesto ni Hong Kong Housing Secretary Winnie Ho ug pagtudlo og independent investigation team aron susihon kung kinsang mga opisyal ang angay manubag ug unsang mga aksiyong pandisiplina ang angay ipatuman.
Giila kini nga labing makamatay nga sunog sa Hong Kong sukad niadtong 1948, nga nakapapahawa usab sa liboan ka residente nga nawad-an og puy-anan.
