Human mapildi sa Portland Trail Blazers sa iskor nga 136-129, nakabawi dayon ang Los Angeles Lakers pinaagi sa pagdominar sa dula batok sa Los Angeles Clippers, diin midaog sila sa iskor nga 103-87.
Bisan wala si Luka Doncic, gipakita sa Lakers ang abilidad sa ilang mga players, ubos sa pagpanguna nila ni Quentin Grimes ug Collin Sexton, aron makuha ang ilang ikaupat nga daog sa lima ka dula karong season ug matala ang 4-1 nga standing.
Nanguna si Grimes sa Lakers pinaagi sa 23 points, samtang nakatampo si Sexton og season-high nga 21 points gikan sa bench. Dugang pa niini, nakaiskor si Austin Reaves og 16 points ug si Matisse Thybulle og 15 points. Nakapuntos usab og upat ka three-pointer matag usa sila si Sexton ug Thybulle.
Sayong gipakita sa Lakers ang ilang maayong dula ug gitapos ang unang quarter nga nag-una sa Clippers, 25-22.
Mas gipadako pa sa Lakers ang ilang labaw sa ikaduhang quarter human nila gidominar ang ilang kontra, 31-16. Natapos ang first half nga nag-una ang Lakers og 18 points, sa iskor nga 56-38.
Sunod nga atubangon sa Lakers ang Golden State Warriors karong Biyernes alang sa pagsugod sa ilang group-stage campaign sa NBA.
