Gipadayon sa Pilipina nga tennis star nga si Alex Eala ang iyang maayong kampanya human niya gidominar ang British player nga si Mika Stojsavljevic sa sunod-sunod nga sets, 6-1, 6-1, sa Round of 32 sa Toray Pan Pacific Open WTA 500 kagahapon Oktubre 26.
Tungod sa kadaugan, nakaabante si Eala sa Round of 16 sa torneyo, diin iyang atubangon ang 22-anyos nga Australian tennis player nga si Talia Gibson, nga karon niranggo nga World No. 38.
Dili na bag-o kang Eala ang pag-atubang kang Gibson, kay kaduha na sila nagkita sa miaging mga torneyo niadtong 2023 ug parehong natapos sa kadaugan sa Pilipina.
Una nga gipildi ni Eala si Gibson sa score nga 6-3, 6-1 sa W40 Palma del Rio sa Spain niadtong Hunyo 2023.
Giatubang niya kini pag-usab ug gipildi kini sa W25 Aldershot sa England, sa tulo ka sets nga adunay score nga 4-6, 6-4, 6-3.
