Nasakmit sa kapulisan ang usa ka hand grenade, usa ka walay marka nga kalibre .38 nga rebolber ug tulo ka bala atol sa pagpatuman sa search warrant sa Sitio Calumpang, Barangay Laguilayan, Isulan, Sultan Kudarat niadtong Oktubre 16, 2026.
Gipahigayon sa mga personahe sa Isulan Municipal Police Station ang operasyon batok sa usa ka giila lamang sa alyas nga “Kaz” tungod sa giingong paglapas sa Republic Act No. 10591 o Comprehensive Firearms and Ammunition Regulation Act. Apan wala didto ang suspek sa dihang gipahigayon ang operasyon ug nagpabilin kining wala pa madakpi.
Narekober usab sa kapulisan ang usa ka itom nga belt bag ug brown nga panyo.
Ang hand grenade gitugyan ngadto sa Explosive Ordnance Disposal personnel sa Sultan Kudarat Provincial Explosive and Canine Unit alang sa hustong pagdumala, samtang ang ubang mga ebidensiya gidala sa Isulan MPS alang sa dokumentasyon ug tukmang disposisyon.
Matod ni Police Regional Office 12 Director PBGen. Alan B. Manibog, magpadayon ang kapulisan sa pagpahigayon og mga operasyong uyon sa balaod aron mapugngan ang ilegal nga pagtipig og armas, bala ug uban pang delikadong kagamitan, ug mapanalipdan ang kaluwasan sa komunidad.
