GENSAN- Nasakmit sa mga kapulisan ang gituohang marijuana nga nagkantidad og kapin sa P1-million ug nadakpan ang usa ka giila nga high-value individual sa buy-bust operation sa Silway Darimco, Barangay Dadiangas West, General Santos City niadtong Oktubre 16, 2026.
Ang nadakpan mao si alyas “Mels,” 21 anyos, ulitawo ug residente sa Barangay Fatima, General Santos City.
Gipahigayon sa mga operatiba sa Police Station 1 sa General Santos City Police Office, uban sa City Intelligence Unit, ang operasyon alas 8:42 sa gabii diin nasakmit ang gibana-banang siyam ka kilo sa gituohang marijuana nga nagkantidad og ₱1,016,000.
Narekober gikan sa suspek ang usa ka medium-sized nga pakete nga gigamit isip buy-bust item, walo ka pakete nga porma og tisa, 61 ka gagmayng pakete sa gituohang marijuana, ₱1,000 nga buy-bust money ug uban pang personal nga mga gamit.
Atubangon sa suspek ang mga kasong kalabot sa giingong paglapas sa Sections 5 ug 11, Article II sa Republic Act 9165 o Comprehensive Dangerous Drugs Act of 2002.
Padayon usab ang imbestigasyon sa mga otoridad ug ang pagpangandam sa mga dokumento alang sa pagpasaka sa kaso.
Gipasalig ni Police Regional Office 12 Director PBGEN Alan B. Manibog nga ipadayon ug pakusgon sa kapulisan ang mga operasyon batok sa ilegal nga droga aron mapanalipdan ang mga komunidad ug malikayan ang makadaot nga epekto niini sa katawhan.
