Nasang-at na ang kasong murder batuk sa suspetsado sa pagpanigbas-patay nakalabay’ng adlaw sa Purok 16, Barangay Maguinda, Butuan City.
Sumala pa ni Police Major Ian Lodonia, station commander sa Butuan City Police Station-4, kasong murder una ang ilang napasaka batuk kang Rodrigo Camora, 54 anyos, residente usab sa maong lugar tungod sa pagpatay kang Rocel Morano nga taga-Barangay Banza ug live-in partner sa iyang stepson nga si Marjun Villena.
Samtang giplastar pa ang mga dokumento sa kasong frustrated homicide tungod sa pagtigbas usab sa iyang stepson tungod kay wala’y mobarog isip saksi sa panghitabo.
Gikumpirma usab sa opisyal nga yuta ang hinungdan sa away ni Rodrigo Camora og ang anak sa iyang kapuyo nga si Marjun Villena.
Nahatagan matud pa og yuta si Marjun sa iyang apuhan apan tungod kay nagkinahanglan og kwarta, iya kining giprenda sa suspek apan bisan og wala pa kini malukat, gibaligya na kini ni Marjun sa laing tawo.
Tungod niini, nagsige na og away sa duha nga nag-abot pa sa barangay.
Ning nakalabay’ng adlaw, na-trigger ang ilang panagbangi tungod kay gusto ni Marjun nga magpataod og kuryente nga ipangalan kaniya apan wala misugot ang suspek tungod kay iya man ang balay ug naki-ipon lang kini kaniya uban sa iyang ka-ipon.
Misangpot ang maong away sa pagkuha og lagaraw sa suspek og gitigbas si Marjun nga swerteng nadaplisan lang rasong nakadagan kini pasulod sa balay.
Dinhe na migawas ang kapuyo ni Marjun nga si Rocel og sila na usab ang naglalis hangtud nga gigukod kini sa suspek.
Nadagma matud pa ang biktima rasong na-abtan sa suspek ug dinhi na gitigbas-patay.
