Nanawagan si Sen. Jinggoy Estrada alang sa diplomasya ug pagtahod sa balaod taliwala sa mga panawagan nga ideklarar si Chinese Ambassador Jing Quan nga persona non grata human sa iyang pahayag nga ang Beijing dali nga modaog kung mogamit kini og kusog sa isyu sa West Philippine Sea (WPS).
Samtang si Estrada miingon nga nasabtan niya ang kasagmuyo ug kabalaka sa publiko sa mga pahayag sa embahador, siya miingon nga ang Pilipinas kinahanglan nga lig-on nga ipahayag ang pagsupak niini nga dili isira ang mga pultahan alang sa diyalogo.
Gipadayag ni Estrada nga ang deklarasyon sa persona non grata dili angay ipatuman nga wala gikonsiderar ang posible nga mga sangputanan.
Miingon siya nga ang Pilipinas mas makapakita sa iyang baruganan pinaagi sa hugot nga pagsunod sa balaod, mga kamatuoran ug mga katungod niini, imbes nga maghimo lang og lig-on nga mga pahayag.
Giinsistir usab sa senador nga ang China kinahanglan nga morespeto sa 2016 Arbitral Award nga nagsilbing basehan sa baruganan sa Pilipinas sa West Philippine Sea.
Dugang niya nga kung ang Beijing tinuod nga nagtinguha og kalinaw, kinahanglan nga morespeto kini sa giingon nga arbitral award.
Sa katapusan, nanawagan si Estrada sa tanang partido nga magpugong sa kaugalingon ug mopili sa diplomasya, pagrespeto sa usag usa, ug pagsunod sa balaod sa pag-atubang sa mga isyu tali sa Pilipinas ug China.
