GENSAN- Gikuwestiyon ni Atty. Rey Cartojano ang desisyon sa prosecution panel sa pag-atras sa pipila ka artikulo sa impeachment case batok kang Vice President Sara Duterte, tungod kay posibleng malimitahan ang kahigayonan sa depensa nga motubag sa mga alegasyon batok kaniya sulod sa impeachment court.
Matod ni Cartojano, posibleng mapugos na lamang ang Bise Presidente sa pagtubag pinaagi sa social media tungod kay wala na mahatagi og higayon ang iyang kampo nga motubag sa mga alegasyon bahin sa confidential funds ug grave threats.
Gikuwestiyon usab niya ang pag-atras sa artikulo bahin sa confidential funds, diin gipaabot unta nga mopresentar ang prosecution og duha ka opisyal sa intelligence nga giingong adunay kalabotan sa maong isyu.
Iyang gipunting nga kaniadto nag-angkon ang prosecution nga lig-on ang ilang ebidensiya, busa ang kalit nga pag-atras sa pipila ka artikulo nagpatungha og pangutana bahin sa kalig-on sa ilang kaso.
Dugang pa ni Cartojano, dili angay dalian ang proseso kon mahimong mawala ang kahigayonan sa depensa nga ipahayag ang ilang bahin, ug adunay laing kapilian ang impeachment court aron masiguro nga madungog ang duha ka kampo.
Matod sa abogado, importante nga patas nga masusi ang mga alegasyon ug malikayan nga ang usa lamang ka kampo ang mahimong basihan sa opinyon sa publiko.
