Padayon ang grabeng wildfire sa Indonesia nga nakaapekto na sa mga lugar sa Sumatra ug Borneo, diin misaka usab ang ihap sa mga tawo nga nakaangkon og sakit sa respiratory system tungod sa aso ug polusyon.
Sumala sa Indonesian Health Ministry, misaka sa kapin 113 K ang mga kaso sa respiratory illnesses nga nalambigit sa wildfire hangtod Septyembre 9, gikan sa kapin 50 mil niadtong Septyembre 1.
Kapin 12.5 milyon ka tawo usab sa pito ka probinsya ang naladlad sa haze o aso nga gikan sa mga sunog.
Giingong usa sa hinungdan sa pagsamot sa wildfire ang grabeng kainit ug hulaw nga nalambigit sa “super El Niño” nga kondisyon.
Samtang nagpadayon ang sunog, gipakusgan sa Indonesia ang mga operasyon sa pagpang-palong niini, lakip ang paggamit og mga eroplano alang sa water bombing ug cloud seeding.
Mitabang usab ang Japan pinaagi sa pagpadala og tulo ka CH-47 Chinook helicopters nga gamiton sa water bombing operations sa West Kalimantan, diin grabe ang epekto sa wildfire.
Tungod sa aso nga mikaylap ngadto sa silingang mga nasod, naapektuhan usab ang kalidad sa hangin sa Malaysia ug Singapore, samtang nakaabot usab ang haze sa pipila ka bahin sa Pilipinas.
