Misukol si Vice President Sara Duterte sa pahayag ni Department of the Interior and Local Government o DILG Secretary Jonvic Remulla nga madrama kuno ang iyang kampo.
Giingon ni Duterte nga si Remulla hinuon ang tinuod nga gusto og drama, human niya ipadayag ang iyang kahadlok alang sa iyang kinabuhi ug sa iyang pamilya tungod sa mga hulga ug pagpangipit nga giingong iyang nasinati gikan sa kapulisan sukad pa niadtong 2023.
Matud pa ni Duterte, ang tinuod nga drama mao ang pag-aresto kang Martin Romualdez.
Miabot ang bise presidente sa Quezon City Regional Trial Court o QC RTC pasado alas-otso sa buntag karong Setyembre 11, uban sa iyang igsoon nga si Davao City 1st District Representative Paolo “Pulong” Duterte, alang sa iyang gikatakdang arraignment.
Ang arraignment may kalabotan sa tulo ka counts sa grave threats nga giatubang ni Duterte tungod sa iyang giingong pagpanghulga sa kinabuhi nila ni Presidente Ferdinand “Bongbong” Marcos Jr., First Lady Liza Araneta-Marcos ug kanhing House Speaker Martin Romualdez atol sa online press conference niadtong Nobyembre 2024.
Wala magdugay ang bise presidente sulod sa korte human gi-postpone ang arraignment tungod sa pending motion nga gisang-at sa iyang legal team.
Sumala sa iyang abogado nga si Atty. Paul Lawrence Lim, nalangan ang pagbasa sa sakdal tungod sa maong pending motion.
Sa wala pa mibiya, giatubang ni Duterte ang iyang mga supporters nga sayo nang nag-abang gawas sa korte ug gihangyo sila nga ipadayon ang pagpakigbisog batok sa korapsyon sa gobyerno.
Nanawagan usab siya kang Presidente Marcos nga mohawa sa puwesto ug gitawag kini og “sinungaling” ug “abusado.”
