Nakasinati na og very strong El Niño sa tropical Pacific nga gilauman nga magdala og grabeng kainit sa Pilipinas hangtod sa unang bahin sa 2027, sumala sa Philippine Atmospheric, Geophysical and Astronomical Services Administration o PAGASA.
Matud ni Ana Liza Solis, Chief sa PAGASA Climate Monitoring and Prediction Section, atol sa hearing sa House Committee on Agriculture and Food niadtong Miyerkules, gilauman nga magpadayon ang El Niño hangtod sa unang quarter sa 2027 ug posibleng maabot ang pinakataas nga lebel sa dili pa matapos ang 2026.
Posible usab nga magpadayon ang epekto niini hangtod sa unang unom ka bulan sa 2027, diin posibleng mosaka hangtod duha ka degrees Celsius ang temperatura sa nagkalain-laing bahin sa nasud.
Base sa climate outlook sa PAGASA, ang dugay nga kakulang sa ulan posibleng magresulta sa grabeng hulaw ug mas taas nga temperatura sa nagkalain-laing lugar sa Pilipinas.
Apan giklaro sa ahensya nga posible gihapon nga adunay mga bagyo ug kusog nga pag-ulan bisan pa sa nagpadayong El Niño.
Samtang, gi-report sa Department of Social Welfare and Development nga mokabat na sa 356,800 ka indibidwal ang naapektuhan sa El Niño niadtong Oktubre.
Milapas usab sa P8.57 bilyon ang kadaot sa sektor sa agrikultura tungod sa maong weather phenomenon, sumala sa Department of Agriculture.
