Pulong Duterte, gihagit ang administrasyon nga ipagawas ang warrant arrest ni Sen. Bato

Gihagit ni Davao City 1st District Representative Paolo “Pulong” Duterte ang administrasyon nga ipagawas sa publiko ang giingong warrant of arrest batok kang Senador Ronald “Bato” dela Rosa ug ipatin-aw ang legal nga basihan niini.

Gikuwestiyon ni Duterte ang giingong paglapas sa due process ug gitandi kini sa pagkadala kang kanhi Pangulong Rodrigo Duterte sa The Hague, Netherlands.

Gipasiugda sa kongresista nga kinahanglan sundon ang Konstitusyon ug Rule of Law sa tanang higayon, bisan kinsa pa ang nalambigit sa kaso.

“Rule of law, not rule by force. Show the warrant,” matud pa ni Duterte.

Gihangyo usab niya ang mga pulis nga dili magpahimulos sa bisan unsang operasyon nga posibleng makalapas sa mga katungod sa katawhan.