Gipunting sa Department of Education o DepEd-General Santos City ang panginahanglan nga mapalig-on ang seguridad sa mga tulunghaan aron malikayan ang pagpasulod sa mga armas ug uban pang deadly weapons nga mahimong magamit sa paghimo og krimen.
Matud ni DepEd-GenSan Schools Division Superintendent Isagani Dela Cruz, importante ang mas hugot nga security measures sa mga eskwelahan aron malikayan ang pagbalik sa susamang insidente nga nahitabo sa Buayan National High School sa Barangay Buayan, diin usa ka estudyante ang nadunggaban.
Gipasabot ni Dela Cruz nga padayon usab ang koordinasyon sa kapulisan aron masiguro ang kaluwasan sa tanang naa sa sulod ug palibot sa mga tulunghaan, lakip na ang mga estudyante, magtutudlo, ginikanan ug school personnel.
Samtang, tutukan usab sa DepEd-GenSan ang papel sa mga guidance advocate sa matag eskwelahan aron matabangan ang mga estudyante nga nakasinati og bullying, ingon man ang mga nalambigit sa pagpang-bully.
