Kapin na sa 2,200 ka mga porma sa franchise ang gi-aprubahan na ug gipaimprinta alang sa pagpirma sa Mayor ug sa sunod nga pag-release ngadto sa mga tricycle operators.
Matud ni Engr. Mylen Jecosala, Department Head sa Public Safety Office o PSO sa General Santos City, ang pagkupot og green plate dili pasabot nga wala pa makakuha og franchise ang usa ka tricycle operator.
Sumala ni Jecosala, kinahanglan una makakuha og franchise ang mga tricycle operators ug pagkahuman niini, mag-apply og change classification sa Land Transportation Office o LTO aron mausab ang classification sa ilang sakyanan ug mapulihan ang green plate ngadto sa yellow plate.
Gipasabot usab ni Jecosala nga tungod kay wala pa nigawas ang bag-ong mga plaka gikan sa LTO, dili pa mahimo nga pintalan o usbon ang kolor sa ilang mga tricycle gikan green ngadto sa yellow.
Padayon usab ang pagproseso sa mga aprubadong franchise forms alang sa pagpirma ug pag-release, samtang gihulat ang pagpagawas sa bag-ong mga plaka sa LTO._
