Padayon gihapon ang wildfire o sunog sa kalasangan sa Indonesia, ilabina sa rehiyon sa Kalimantan, diin kapin na sa usa ka bulan nga gitaho ang mga insidente sa sunog.
Matud ni Cesario Labajo, Bombo International Correspondent sa Indonesia, kasamtangang ting-init sa maong nasod ug tungod niini, mas dako ang posibilidad nga magpadayon ang pagkasunog sa mga kalasangan.
Sa Kalimantan, dili kaayo daghan ang mga tawo sa mga lugar nga apektado sa wildfire, apan aktibo ang gobyerno sa Indonesia sa pag-atubang sa sitwasyon.
Dugang pa niini nga, bisan pa man sa sunod-sunod nga sunog, nagpadayon gihapon ang normal nga panginabuhi sa mga residente. Nagpadayon sila sa pagtrabaho ug sa ilang adlaw-adlaw nga mga kalihokan samtang ang mga otoridad nagpadayon usab sa ilang paningkamot aron mapalong ug makontrol ang mga sunog sa kalasangan.
Padayon usab ang paningkamot sa gobyerno ug mga responder aron mapugngan ang pagkaylap sa sunog ug malikayan ang mas dakong epekto niini sa kalikupan ug sa mga komunidad.___
