Nagpadayon ang lokal nga panggamhanan sa General Santos City sa pagpatuman sa programa nga “Basura Mo, Bigas Ko” isip kabahin sa kampanya sa syudad alang sa kalimpyo sa komunidad ug pagtabang sa mga residente.
Matag Biyernes, pinaagi sa Serbisyong Heneral, ginadumala ang maong programa sa mga nakatakdang barangay diin mahimong makadala ang mga residente og usa ka sako nga adunay mga plastik nga botelya ug mga empty sachets.
Puli niini, makadawat ang matag partisipante og duha ka kilo nga bugas isip insentibo sa ilang pag-apil sa paglimpyo ug husto nga pagdumala sa basura.
Tumong sa programa nga mapalig-on ang partisipasyon sa komunidad sa pag-atiman sa kalikupan samtang naghatag usab og dugang nga tabang sa mga pamilya.
Padayon usab ang panawagan sa lokal nga panggamhanan sa katawhan nga makigbahin sa maong kalihukan aron mapadayon ang kahinlo ug kaayohan sa General Santos City.
