Libo-libo nga mga pasahero ang nadelatar ang biyahe sa nag unang tugpahanan sa Kenya human mosulod sa ikaduhang adlaw ang “go-slow strike” sa mga empleyado niini.
Ang maong lihok protesta sa Jomo Kenyatta International Airport gipangunahan sa Kenya Aviation Workers’ Union o KAWU tungod sa dili pagkasinabtanay sa collective bargaining agreement ug kakulang sa kooperasyon gikan sa mga awtoridad sa tugpahanan ug mga kompanya sa airline.
Tungod sa maong sitwasyon, pipila ka tugpahanan ug airline ang mikansela sa ilang mga biyahe paingon sa Nairobi tungod sa mga problema sa air traffic control.
Milapas sa 12 ka oras ang paghulat sa pipila ka pasahero sa tugpahanan sa wala pa sila gipahibalo nga gikansela o gibalhin sa sunod adlaw ang ilang mga flight.
Padayon usab ang pakigpulong sa mga opisyal sa KAWU uban sa mga opisyal sa gobyerno aron masulbad ang maong isyu, apan nagpadayon gihapon ang strike samtang gipadayon ang negosasyon.
