Gipadayag ni Senate Committee on Energy Chairman Erwin Tulfo ang pag-amendar sa Oil Deregulation Law aron mahimong mas klaro ug transparent ang paagi sa pagtakda sa presyo sa lana sa nasod.
Matud ni Tulfo, kinahanglan hatagan og mas dako nga gahum ang Department of Energy o DOE aron mangayo og katin-awan gikan sa mga kompanya sa lana matag higayon nga magpataas kini sa presyo.
Giinsistir sa senador nga dili dapat basta ipasa lamang ngadto sa mga motorista ug transport sector ang kalit nga pagsaka sa presyo sa krudo kung walay klarong pagpasabot kung giunsa pagtakda ang presyo.
Dugay na usab nga gihangyo sa transport sector ang mas klaro nga pagpasabot sa mga pagbag-o sa presyo sa lana tungod kay direktang nakaapekto kini sa ilang panginabuhi ug sa presyo sa mga palaliton.
Gikumpara usab ni Tulfo ang Oil Deregulation Law sa Electric Power Industry Reform Act o EPIRA, nga matud pa niya, mitugot sa pagpasa sa pipila ka gasto sa mga kompanya sa kuryente ngadto sa mga konsumidor.
Bisan pa niini, gidugang pa ni Tulfo nga dili lamang ang kadako o kagamay sa mahimong maminusan sa presyo sa lana ang angay tan-awon. Matud niya, importante ang matag piso nga matigom sa ordinaryong mga Pilipino, ilabina karon nga taas ang presyo sa lana ug uban pang importanteng palaliton.
