Gituohan ni Deputy Speaker ug La Union Rep. Paolo Ortega V nga importante ang testimonya sa mga opisyal sa Armed Forces of the Philippines (AFP) aron makompleto ang istorya kung giunsa kuno sa sayop nga paggamit ang confidential funds ni Vice President Sara Duterte. Matud ni Ortega, mas klaro na ang kamatuoran kung asa naadto ang kuwarta nga walay kauban nga mga resibo.
Gilauman nga motestigo sila Col. Manaros Boransing II ug Col. Magtangol Panopio kalabot sa mga sertipikasyon nga gisumite sa Department of Education (DepEd) sa panahon nga kalihim pa niini si Duterte.
Gipasiugda sa mambabatas nga dili trabaho sa mga sundalo ang pagdumala o pag-apod-apod sa pondo, kondili ang paghatag lamang og seguridad.
Matud usab ni House impeachment team spokesperson Ace Barbers, importante nga mahibal-an kung nganong nadamay ang militar ug kung gigamit lamang ba sila sa mga politiko.
Apan giklaro ni Barbers nga dili ang AFP ang sentro sa impeachment trial, kondili ang pagpanubag gihapon sa Bise Presidente sa giingong sayop nga paggamit ug liquidation sa maong pondo.
