Nagpasidaan ang Department of the Interior and Local Government (DILG) sa mga personnel sa Bureau of Fire Protection (BFP) nga nalambigit sa gitawag nga “slot for sale” modus, taliwala sa nationwide recruitment alang sa kapin 2,000 ka bakanteng posisyon sa ahensya.
Kalabot niini ang usa ka kaso diin usa ka personnel sa BFP nga may ranggong Senior Fire Officer 1 ang giingong mitanyag og slot ngadto sa usa ka aplikante kapalit sa P300,000.
Naa na sa kustodiya sa Criminal Investigation and Detection Group (CIDG) ang suspek ug kasamtangang detained samtang nag-atubang og kaso nga robbery extortion.
Sumala kang Interior Secretary Jonvic Remulla, seryoso ang ilang kampanya sa paglimpyo sa ahensya batok sa katiwalian ug korapsyon, ug siguruhon nga manubag ang bisan kinsa nga mapamatud-ang nalambigit niini.
Dugang pa ni Remulla, giimbestigahan na sa DILG ang kapin 200 ka personnel, lakip ang pipila ka regional directors nga gidudahang nalambigit sa maong modus. Giingong mokabat sa P100,000 hangtod P800,000 ang bayad sa matag transaksyon.
Gipasiugda usab sa ahensya ang “e-hiring recruitment system” nga gitumong sa pagsumpo sa korapsyon ug pagsiguro nga walay human intervention sa unang mga lakang sa recruitment process.
Tumong usab sa bag-ong sistema nga mapaspas ang proseso alang sa mga aplikante ug maminusan ang ilang gasto sa pag-aplay.
