Wala pa’y hingpit nga desisyon ang defense team ni Vice President Sara Duterte kon ipatawag ba nila isip testigo si Col. Raymund Dante Lachica sa nagpadayong impeachment trial batok sa bise presidente.
Matod ni defense spokesperson Atty. Michael Poa, ilang hulaton una nga mahuman sa prosecution ang presentasyon sa ilang mga ebidensya una sila mohukom kon kinsa sa ilang mga posibleng testigo ang kinahanglan nilang ipaatubang sa impeachment court.
Matod niya, human mahisgoti ang matag artikulo sa impeachment, ilang susihon sulod sa ilang legal team kon unsang mga punto ang kinahanglan nilang klarohon ug unsang depensa ang ilang ipakita.
Si Lachica, nga kanhi hepe sa Vice Presidential Security and Protection Group, nahimong sentro sa testimonya sa kanhi Office of the Vice President special disbursing officer nga si Gina Acosta.
Matod ni Acosta, gihatag niya ngadto kang Lachica ang mga confidential funds ug siya ang gitudlo aron magpatuman sa mga confidential activities sa OVP.
Samtang, giingon ni Lachica nga andam siyang motestigo kon legal siyang ipatawag sa impeachment court, ug mipasalig usab ang Armed Forces of the Philippines nga motuman kini kon adunay hustong summons gikan sa korte.
