Gipanghimakak ni National Bureau of Investigation (NBI) Director Atty. Melvin Matibag ang alegasyon nga China lamang ang ilang gipunting sa operasyon batok sa mga steel companies.
Sumala kang Matibag, dili nationality ang basehan sa ilang operasyon, kundili ang mga report ug intelligence information kabahin sa posibleng paglapas sa product standards, workplace safety ug uban pang regulasyon.
Matud niya, adunay mga steel plant sa nagkadaiyang lugar sa nasud nga padayon nilang gi-monitor.
Karong agosto, miabot na sa lima ka steel facilities ang na-raid sa NBI, duha sa Pampanga, usa sa Bulacan, usa sa Misamis Oriental ug ang pinakabag-o sa Davao City.
Sa operasyon sa Davao Mighty Steel Corporation sa Barangay Ilang, Davao City, nakit-an sa mga awtoridad ang mga steel products nga giingong substandard ug mga materyales nga adunay radioactive isotopes, lakip ang uranium, thorium ug radium.
