Nagpadayon ang Department of Transportation (DOTr) ug Light Rail Transit Authority (LRTA) sa pagpangita og pondo aron makapalit og dugang nga mga tren alang sa Light Rail Transit Line 2 o LRT-2.
Sumala sa management, mokabat og tulo ka tuig o labaw pa una pa moabot ang mga bag-ong tren, busa nangita ang DOTr og alternatibong mga paagi aron makontrol ang dagan sa mga pasahero sa matag estasyon.
Walo lamang ka tren ang kasamtangang nagserbisyo human ang usa ka tren gipailalom sa pag-upgrade sa Train Operating Control Panel, samtang ang usa pa gipaayo.
Isip temporaryong solusyon samtang naghulat sa pondo alang sa dugang nga mga tren, gimandoan ni Transportation Secretary Banoy Lopez ang Land Transportation Franchising and Regulatory Board (LTFRB) ug LRTA nga tun-an ang pag-isyu og mga espesyal nga permit alang sa mga public utility bus aron mahatagan og alternatibong transportasyon ang mga pasahero.
Matod ni Lopez, nagpadayon sila sa pagpangita og pondo alang sa gikinahanglang mga tren ug pag-upgrade sa ubang mga sakyanan, samtang nagtan-aw usab og mga paagi aron maminusan ang mga pila sa estasyon ug matabangan ang mga commuter.
