Gihulagway ni Pangulong Ferdinand “Bongbong” Marcos Jr. isip usa ka “highest level of national concern” ang alegasyon nga adunay pondo gikan sa China nga nadawat sa usa ka kompanyang nalambigit kang Vice President Sara Duterte kung mapamatud-ang tinuod kini.
Sa iyang pahayag, gipasiugda sa Presidente nga gusto niyang matino una ang kamatuoran kabahin sa maong alegasyon, ilabina tungod sa posibleng epekto niini sa nasudnong seguridad sa Pilipinas.
Atol sa impeachment proceedings batok kang Duterte, gikatahong gikumpirma sa Anti-Money Laundering Council nga usa ka kompanyang adunay kalambigitan sa Bise Presidente ug sa iyang bana nakadawat og ₱319 milyon gikan sa China ug Hong Kong. Matod ni Marcos, ang gikatahong pagdawat og pondo gikan sa China maoy usa sa labing nakapabalaka nga bahin sa maong isyu.
Naglaom ang Presidente nga mapamatud-ang walay kamatuoran ang maong mga alegasyon batok sa Bise Presidente. Pabor usab siya sa planong imbestigahan sa Department of National Defense ang gikatahong pondo aron matino ang tinubdan ug katuyoan niini.
Sa laing bahin, gilimod ni Marcos nga nanghilabot siya sa impeachment proceedings batok kang VP Sara. Matod niya, kinahanglan una nga matino ang kamatuoran ug makuha ang mga ebidensiya kalabot sa alegasyon sa Bise Presidente nga siya ang anaa sa luyo sa mga paninira batok kaniya, lakip na ang impeachment.
Ang Senado ang motuman sa katungdanan niini kalabot sa impeachment proceedings, samtang nagpabilin siyang nakapokus sa pagpatuman sa mga programa sa administrasyon sa dili pa matapos ang iyang termino.
Gihulagway usab ni Marcos isip “fake news” ang mga akusasyon ni Duterte batok kaniya ug miingon nga wala siyay nakitang basihan sa alegasyon nga siya ang nagpaluyo sa mga pagpang-daot batok sa Bise Presidente.
Samtang, hugot nga gisalikway ni Atty. Salvador Paolo Panelo, tigpamaba ni Duterte, ang mga alegasyon nga nalambigit ang Bise Presidente sa China tungod sa gikatahong pagdawat og pondo. Matod niya, walay basihan ang maong pagkonektar.
Sa pagkakaron, gikinahanglan pa ang dugang nga pagsusi ug ebidensiya aron matino ang kamatuoran sa maong mga alegasyon.
