Nanawagan si Manila Archbishop Jose Cardinal Advincula sa mga magtutuo nga hatagan og dugang pagtagad ang kahimtang sa mga batan-on, labi na ang mga problema nga ilang giagian nga wala mamatikdi sa ilang mga ginikanan, magtutudlo, ug komunidad.
Sa iyang mensahe sa pakighiusa nga gipagawas niadtong Biyernes, Agosto 21, gipasiugda ni Advincula ang kamahinungdanon sa pagpamati ug pagsabot sa mga batan-on nga hilom nga nakasinati og kasubo, kabalaka, kawalay paglaum, mga problema sa pamilya, bullying, ug academic pressure.
Sumala sa kardinal, ang mga batan-on dili lang angay paminawon kon sila mosulti apan labi na kon sila hilom nga naglisod.
Giawhag usab niya ang paghimo og luwas nga mga lugar diin ang mga batan-on makasulti nga walay kahadlok sa paghukom, mangayo og tabang nga walay kaulaw, ug mobati nga gipabilhan ug gihigugma.
Gipagawas ni Advincula ang mensahe human sa pagpamusil sa Ateneo de Zamboanga University niadtong Agosto 18 nga nakapatay sa duha ka estudyante, lakip ang suspek.
Para sa kardinal, ang tubag sa trahedya dili angay matapos sa simpatiya ug pagbangotan alang sa mga biktima. Hinuon, kini angay magsilbi nga usa ka oportunidad aron mas masabtan ang giagian sa mga batan-on.
Nanawagan usab siya alang sa kolektibong aksyon aron mapalig-on ang kultura sa pag-atiman, kaluoy, diyalogo ug giya taliwala sa mga batan-on, imbes nga tugotan ang kahadlok ug kapintasan nga mopatigbabaw.
