Nanawagan si Senator Loren Legarda og dinalian nga aksyon gikan sa Kongreso aron matubag ang problema sa pagka-overcrowded sa mga estudyante sulod sa mga classroom sa mga pampublikong eskwelahan.
Matud sa senadora, dili lamang ang kalidad sa edukasyon ang apektado niini kondili apil usab ang kahimtang sa mga magtutudlo.
Bisan pa man nga mikunhod na ang national student-to-classroom ratio, miingon si Legarda nga wala niini mapakita ang tinuod nga kahimtang sa pipila ka lugar nga nakasinati gihapon og grabe nga overcrowding.
Base sa 2025 study sa Philippine Institute for Development Studies (PIDS) ug Second Congressional Commission on Education, mikunhod gikan sa 39 ngadto sa 32 ka estudyante matag classroom ang average ratio sa public elementary schools niadtong 2021.
Sa junior high school, mikunhod usab kini gikan sa 54 ngadto sa 44 ka estudyante matag classroom.
Apan sa pipila ka mga eskwelahan sa National Capital Region, Calabarzon, SOCCSKSARGEN ug Bangsamoro Autonomous Region in Muslim Mindanao, milapas gihapon sa 60 ka estudyante ang anaa sa usa ka classroom.
Matud ni Legarda, mahimong makaapekto ang sobra nga gidaghanon sa mga estudyante sulod sa usa ka classroom sa kalidad sa pagtudlo ug pagkat-on, ingon man sa kaayohan sa mga magtutudlo.
Aron masulbad kini, gipasaka ni Legarda ang Senate Bill No. 2397 o ang proposed Public School Class Size Act.
Tumong sa maong sugyot nga maestablisar ang mas hapsay ug angay nga gidak-on sa klase sa mga pampublikong eskwelahan ug masiguro ang igo nga learning environment alang sa mga estudyante ug magtutudlo.
Giinsistir ni Legarda nga gikinahanglan ang dinalian nga legislative action aron matubag ang problema sa overcrowded classrooms ug mapalambo ang kalidad sa edukasyon sa nasud.
