Mibida pag-usab ang 13-anyos nga si Keirsten Fernandez human makuha ang iyang ikaduhang bulawan nga medalya sa Asian Open Short Track Speed Skating Trophy nga ginapahigayon sa India.
Nanguna si Fernandez sa Junior C Girls’ 777-meter event human makarekord og oras nga 1:19.989, nga nakapildi sa Australianong si Rachel Yi Lin Tan ug uban pang mga kontestante.
Niadtong Miyerkules, nakuha usab ni Fernandez ang bulawan nga medalya sa 1,000-meter event sa samang age category, nga maoy unang bulawan nga medalya nga nasungkit sa Pilipinas sa kasaysayan sa maong torneo.
Samtang, midugang usab og medalya alang sa Pilipinas si Xsandrie Guimba nga nakadaog og silver medal sa senior women’s 1,000-meter event human makarekord og oras nga 1:52.003.
Nakuha usab og bronze medal ang walo ka tuig nga si Zymone Zurbito sa Junior F Boys’ 333-meter event.
Sa kinatibuk-an, upat ka medalya na ang na-uli sa Pilipinas sa maong torneo.
