Plano sa Gilas Pilipinas nga magpahigayon og ‘training camp’ sa Seremban, Malaysia isip pagpangandam sa sunod nga ‘window’ sa FIBA World Cup Asian Qualifiers.
Matod ni Samahang Basketbol ng Pilipinas (SBP) executive director Erika Dy, kabahin gyud sa plano ni Gilas coach Tim Cone ang pagpahigayon og pagbansay sa usa ka nasod sa Southeast Asia.
Dugang niini, posibleng sayo silang molarga aron masugdan ang pagbansay sa Malaysia, apan kon dili kini madayon, dinhi na lamang sa Pilipinas ipahigayon ang ilang training camp.
Nakatakda ang sunod nga FIBA window sa Nobyembre 27 ug 29, diin tumong sa Gilas nga mapauswag ang ilang baroganan nga upat ka daog ug upat ka pildi.
Una nilang atubangon ang Syria sa Nobyembre 27, samtang rematch batok sa Iran ang ilang sunod nga duwa sa Nobyembre 29.
