Target sa Pebrero 14, 2027 ang paglunsad sa kauna-unahang demonstration rocket sa Pilipinas isip kabahin sa pagpalig-on sa programa sa nasud sa sektor sa space technology.
Gipadayag sa mga opisyal sa Department of Information and Communications Technology (DICT), Philippine Space Agency (PhilSA), ug Cagayan Economic Zone Authority (CEZA) nga nagsugod na ang countdown alang sa maong inisyatibo.
Matud ni DICT Secretary Henry Aguda, ang orihinal nga target sa mga engineer mao ang paglunsad tali sa Pebrero 12 hangtod 15, hinungdan nga iyang gisugyot ang Pebrero 14 isip simbolikong petsa.
Samtang, gipatin-aw ni PhilSA Director General Gay Jane Perez nga ang Pebrero 14 usa lamang ka target launch window ug mahimong mausab depende sa kondisyon sa panahon ug teknikal nga kahimtang sa adlaw sa paglunsad.
Gipili ang Cagayan isip lugar sa demonstration launch tungod sa lokasyon niini nga duol sa equator, angay nga heograpiya, anaa nang imprastraktura, ug lapad nga katubigan nga mahimong luwas nga dapit kung adunay mahulog nga debris gikan sa rocket.
Sumala kang CEZA Chief Secretary Katrina Ponce Enrile, gilauman nga ang maong proyekto makamugna og mga 15,800 ka trabaho ug makatampo og hangtod 3.6 bilyong dolyar nga economic activity matag tuig.
Gipahibalo ni Pangulong Ferdinand Marcos Jr. ang maong plano atol sa iyang 2026 State of the Nation Address, diin ipatuman kini pinaagi sa pakigtambayayong sa usa ka South Korean aerospace company.
