Usa ka propesyonal nga ‘puppeteer’ gikan sa North Carolina, U.S.A., ang nakabawi sa titulo sa Guinness World Record alang sa kinadak-ang koleksyon sa mga ‘finger puppet’ human siya midugang og dul-an sa 1,000 ka buok sa iyang koleksyon.
Si Cheralyn Lambeth, gikan sa Charlotte, aduna nay 3,451 ka ‘finger puppet’—usa ka kalamposan nga nagtugot kaniya sa pagbawi sa opisyal nga titulo alang sa “kinadak-ang koleksyon sa mga ‘finger puppet’ niadtong Enero 18.
Si Lambeth ug ang kauban niyang kolektor nga si Salacnib “Sonny” Molina, gikan sa Illinois, nag-ilogay sa maong rekord sulod na sa pipila ka tuig.
Si Molina ang unang nakakuha sa titulo niadtong 2021 nga adunay 497 ka finger puppet. Paglabay sa usa ka tuig, nalabwan siya ni Lambeth human niabot ang iyang koleksyon sa 563. Nabawi ni Molina ang pagpanguna niadtong 2023, diin gipadako niya ang iyang koleksyon ngadto sa 1,517.
Apan, nagpadayon ang pagdako sa koleksyon ni Lambeth, ug nabawi niya ang rekord niadtong 2025 nga adunay 2,540 ka piraso. Pipila lang ka bulan ang milabay, nalabwan na usab siya ni Molina, kinsa miabot sa 2,978. Wala kini makapaluya kang Lambeth; nagpadayon siya sa paghimo ug pagpangolekta, ug sa pagkakaron, anaa na sa 3,451 ka finger puppet ang iyang kinatibuk-ang ihap.
Nagsugod ang iyang koleksyon atol sa pandemya, diin nagpabilin siya sa balay ug naghimo og yano nga mga ‘hand puppet’ ug ‘finger puppet’—usa ka proyekto nga iyang gihunahuna nga mahimong buhaton sa mga ginikanan ug mga anak.
