Gipahayag sa kanhi Commission on Audit Intelligence and Confidential Funds Audit Office (COA-ICFAO) state auditor Roderick Wamil nga wala mosunod sa mga giya sa 2015 Joint Circular ang physical ug financial plan sa Office of the Vice President (OVP) nga giaprobahan niadtong Disyembre 2022.
Gihimo ni Wamil ang pahayag atol sa ika-11 nga adlaw sa impeachment trial ni Sara Duterte human siya pangutan-a ni House private prosecutor Atty. Lorna Kapunan kabahin sa iyang obserbasyon sa gipresentar nga kopya sa 2022 physical ug financial plan sa OVP.
Matod ni Wamil, dili kini compliant sa Joint Circular tungod kay wala giapil sa OVP ang piho nga confidential activities diin gamiton ang confidential funds, nga usa sa mga gikinahanglan ilalom sa maong patakaran.
Gipasabot sa auditor nga bisan adunay nakalista nga mga programa, kalihokan, ug proyekto sa maong dokumento, wala niini gipakita ang espesipikong mga kalihokan nga pagagamitan sa confidential funds sumala sa Item 4.2 sa Joint Circular.
Nagpadayon ang pagdungog sa Senado sa mga testimonya ug dokumento may kalabutan sa alegasyon sa giingong sayop nga paggamit sa confidential funds sa OVP ug Department of Education (DepEd).
