Gibutyag ni Ombudsman Jesus Crispin “Boying” Remulla nga usa ka “ghost electricity” ang giingong kapakyasan sa solar energy firm ni Batangas 1st District Representative Leandro Leviste sa pagtuman sa gisaad nga produksyon sa kuryente alang sa nasud.
Matod ni Remulla, kung adunay mga “ghost flood control projects” nga giimbestigahan karon, ang kaso batok sa kompanya ni Rep. Leviste iyang gitawag usab nga “ghost electricity” tungod kay wala matuman ang gipaabot nga produksyon sa enerhiya base sa prangkisa nga gihatag sa kompanya.
Gipasabot sa Ombudsman nga kabahin unta ang maong solar project sa Philippine Energy Plan diin gilauman nga makapadugang kini sa suplay sa kuryente nga magamit sa katawhan.
Giingon ni Remulla nga ang wala pagtuman sa gisaad nga produksiyon sa enerhiya sa maong solar firm mahimong usa sa mga hinungdan nganong nagpabiling taas ang presyo sa kuryente sa nasud.
Gihingusgan usab sa opisyal nga napakyas ang kompanya sa pagtuman sa iyang saad sa panahon nga gihatagan kini og prangkisa sa gobyerno.
Gipahibalo ni Ombudsman Remulla nga gisulod na sa preliminary investigation ang mga reklamo nga plunder, graft and corruption, ug conflict of interest batok kang Rep. Leviste.
