Dili lang P350,000 ang exempted sa income tax para sa mga trabahante apan lakip na usab ang ubang mga benepisyo sama sa 13th month pay.
Nasayran kini gikan sa chairman sa House ways and means committee ug Marikina Rep. Miro Quimbo, mao nga mas taas ang take-home pay sa mga trabahante kay dili lang ang ilang tinuod nga sweldo ang exempted sa buhis.
Mahinumduman nga si Presidente Ferdinand “Bongbong” Marcos Jr. nagmando nga ang income tax exemption dugangan ngadto sa P350,000 gikan sa kasamtangang P250,000 kada tuig taliwala sa nagkataas nga inflation rate.
Bisan pa, daghan ang ubos sa P350,000, sama sa Makabayan bloc sa House, nga adunay lahi nga proposal nga dugangan ang income tax exemption ngadto sa P500,000, apan si Quimbo miingon nga ang income tax exemption nga giduso sa presidente mas dako pa kay bisan ang 13th-14th month ug uban pang year-end benefits kuno exempted sa income tax.
Matod ni Quimbo nga magsugod ang usa ka hearing sa komite bahin niining tax relief package sa sunod semana, diin ang Department of Finance (DOF) unang ipatawag aron mahibal-an ang mga implikasyon niini sa kita sa gobyerno sa dili pa konsultahon ang mga trabahante, amo, ug uban pa.
Una nang giingon sa magbabalaod nga ang nahisgutang lakang ipasar dayon ug ilang target nga ipatuman kini sugod Enero 1, 2027 aron matabangan ang mga middle-class earners nga kanunayng mabiyaan o dili mahatagan og ayuda kung adunay krisis.
