Siyam sa 51 ka mga raliyista nga gidakop tungod sa mga kalapasan atol sa sunod-sunod nga mga aksyong protesta nga gilunsad dungan sa State of the Nation Address (SONA) sa Presidente niadtong Lunes, Hulyo 27, ang gipasakaan na og kaso.
Una nga gidakop sa pulisya ang dose-dosenang mga raliyista tungod sa pagsul-ob og gidili nga balaclava o tabon sa nawong ug graffiti sa bungbong sa Diliman substation sa Meralco.
Niadtong Martes, ang mga suspek gipailalom sa inquest proceedings sa Quezon City Prosecutor’s Office tungod sa mga kalapasan sama sa graffiti, obstruction of justice, resistance and disobedience to a person in authority, malicious mischief and disorder.
Ang 30 pa ka mga suspek gibuhian samtang ang mga awtoridad nagpadayon sa ilang imbestigasyon.
Ang 12 ka mga menor de edad gibuhian usab kaniadto ug gitugyan sa ilang mga ginikanan. Apan sa wala pa sila gibuhian, gipailalom sila sa medico-legal examination ug profiling sa lokal nga Social Services Development Department.
