Nangayo og pasaylo si DPWH Secretary Vince Dizon ngadto sa mga residente sa General Santos City tungod sa dakong perwisyo nga nahatag sa nalangan nga Mabuhay Underpass nga nilungtad og pila ka tuig.
Matod ni Dizon, personal niyang gisuta ang kasamtangang kahimtang sa proyekto aron masiguro nga hingpit na kini ug andam nang maablihan sa publiko karong adlawa bisan pa man nga dili kini 100 percent finish.
Gibutyag usab sa kalihim nga gamay na lamang ang nahibiling trabaho sa proyekto ug andam na kini nga maagian sa mga motorista, nga gilauman nga makatabang sa pagpagaan sa trapiko ug sa pagpasayon sa pagbiyahe sa dakbayan.
Nagpasalamat usab si Dizon sa pailob ug pagsabot sa mga residente ug mga motorista nga naapektuhan sa dugay nga konstruksyon, samtang gilauman nga ang pag-abli sa Mabuhay Underpass makahatag na og dugayng solusyon sa pagsulbad sa problema sa trapiko sa maong lugar.
