Giaprobahan na sa ikatulo ug katapusang pagbasa sa House of Representatives ang balaodnon nga nagtumong sa paglimitar sa paggamit sa social media ug pipila ka digital platforms sa mga menor de edad.
Nakakuha og 287 ka boto nga pabor, tulo ang supak ug walay nag-abstain ang House Bill 11566 o ang Safe and Friendly Environment for Kids in Digital Spaces (SAFE Acts) Act.
Ubos sa gisugyot nga balaod, gidili ang mga batang ubos sa 13 anyos sa paghimo og account sa social media ug pipila ka digital platforms, samtang ang mga nag-edad og 13 hangtod 18 tugotan sa paggamit niini ubos sa gitakdang mga pagdili.
Lakip sa mga limitasyon ang pagpanalipod sa mga menor de edad batok sa makadaot ug gidili nga sulod, behavioral profiling, dili kinahanglan nga pagkolekta ug pagpaambit sa personal nga impormasyon, dili awtorisadong mga pagpalit ug mga kalihokan nga susama sa sugal.
Nagtakda usab ang balaodnon sa pagtukod sa Office for Children’s Social Media and Digital Safety ubos sa Department of Information and Communications Technology aron bantayan ang pagsunod sa balaod, magpahigayon og teknikal nga pagsusi ug pasiunang imbestigasyon, ug makig-alayon sa ubang ahensiya sa gobyerno. Ang National Telecommunications Commission usab ang gitahasan sa pagpatuman niini.
Samtang, giaprobahan usab sa Senado niadtong miaging semana ang susamang balaodnon nga nagtumong sa pagpanalipod sa mga menor de edad sa digital nga kalibotan.
