Kapin sa 21,000 ka mga pulis ang ipakatap sa Philippine National Police isip kabahin sa security operation alang sa ika-5 nga State of the Nation Address ni Pangulong Ferdinand Marcos Jr. sa Batasang Pambansa sa Quezon City karon, Hulyo 27, 2026.
Matud ni PNP Chief Police General Jose Melencio Nartatez Jr., nahuman na ang ilang security protocol ug gipadayon na lamang ang phased deployment sa mga pulis sa mga lugar nga nanginahanglan og mas hugot nga pagbantay.
Matud pa sa PNP chief, andam ang ilang hanay aron masiguro ang kaluwasan sa mga opisyal sa gobyerno, mga bisita, ug sa publiko atol sa pagpahigayon sa SONA.
Gimandoan usab niya ang mga pulis nga magpadayon sa pagpatuman sa maximum tolerance atol sa ilang katungdanan ugma.
Gihangyo usab niya ang mga grupo nga magpahigayon og protesta nga makigtambayayong sa mga awtoridad ug motuman sa naglungtad nga mga balaod aron mapadayon ang kahapsay ug kalinaw.
Matud pa sa PNP, wala silay namonitor nga seryosong hulga sa seguridad nga may kalabotan sa SONA. Bisan pa niini, nagpabilin nga nakaalerto ang kapulisan aron dayon makatubag sa bisan unsang posibleng kagubot.
Gipahimutang na usab sa full alert status ang kapulisan sa Metro Manila, ug magpatuman usab ang PNP og mas hugot nga gun control measures ning adlawa.
Samtang, ipatuman usab ang no-fly zone ug no-drone zone sa pipila ka mga lugar, lakip na ang palibot sa Batasang Pambansa, diin ipahigayon ang pakigpulong sa Pangulo.
Tulo ka grupo ang gitugotan sa Quezon City government nga magpahigayon og mga rally sa Commonwealth Avenue—ang Bagong Alyansang Makabayan, Sanlakas, ug Better Brighter.
Nanawagan ang PNP sa mga organizer sa mga protesta nga bantayan ang ilang mga miyembro batok sa posibleng mga manggubot.
Gimando usab sa PNP chief ang tanang pulis nga na-assign sa seguridad sa SONA nga mogamit og body-worn cameras ug uban pang recording equipment aron masiguro ang transparency sa ilang mga operasyon.
