Gitun-an karon sa Philippine National Police ang sugyot nga magpahugot sa paggamit sa social media sa mga kabatan-onan.
Ang maong sugyot mitumaw atol sa ika-44 nga ASEANAPOL Conference diin nagbayloay og mga panan-aw ang mga lider sa kapulisan kabahin sa nagkagrabeng mga hulga sa seguridad nga nalambigit sa mga kabatan-onan ug sa cyberspace.
Matod ni PNP Chief Police General Jose Melencio Nartatez Jr., gusto nilang susihon ang modelo nga gipatuman sa Australia.
Kabahin sa mga gihisgutan sa komperensya ang insidente sa pagpamusil sulod sa usa ka eskwelahan sa Tacloban City diin mga kabatan-onan ang nalambigit.
Dugang pa ni Nartatez, human sa ilang pakigtigom sa mga silingang nasud, ilang namatikdan nga adunay mga balaod nga gipatuman didto nga mahimong ikonsidera usab alang sa posibleng pagpatuman sa Pilipinas.
