Dili sayon ang pagpanginabuhi isip usa ka vendor, ilabi na karon nga daghan na ang gastuhonon ug bayranan sa sulod ug gawas sa merkado.
Matud ni Leticia Vibar, spokesperson sa Central Public Market, naglisod na ang daghang vendors tungod sa kadaghan sa ilang obligasyon, diin adunay bayranan sa renta sa ilang pwesto sulod sa palengke, ug adunay dugang usab nga bayranan kung ibutang sila sa temporaryong pwesto sa gawas.
Sumala kang Vibar, imbis nga mogaan ang kahimtang sa mga namaligya, mas mudako pa hinuon ang ilang kabug-at tungod sa nagkadaiyang isyu nga giatubang sa merkado, lakip na ang kahimtang sa ilang pwesto ug kahinlo sa palibot.
Gihangyo ni Vibar ang lokal nga panggamhanan nga tagaan og konsiderasyon ang kahimtang sa mga vendors ug makapangita og solusyon nga dili makadugang sa ilang pinansyal nga palas-anon.
Matud pa niya, ang mga vendors andam mosunod sa mga kausaban alang sa kaayohan sa Central Public Market, apan gilauman nila nga ang mga lakang nga ipatuman makatabang usab sa ilang panginabuhi, dili mahimong dugang nga problema. __
