Gibutyag ni National Bureau of Investigation (NBI) Director Atty. Melvin Matibag nga dili mahimong basehan ang popularidad o taas nga trust rating sa usa ka opisyal aron malikayan ang pagpanubag sa mga alegasyon nga iyang giatubang.
Ang pamahayag ni Matibag gisunod sa pangutana ni defense counsel Atty. Mark Vinluan kon mahimo bang adunay “betrayal of public trust” si Vice President Sara Duterte bisan pa sa iyang taas nga trust rating.
Sa wala pa ang maong pangutana, gipakita ni Vinluan ang usa ka publication material nga nagpakita nga si Duterte adunay 57 porsiyentong public trust rating, samtang 34 porsiyento lamang ang kang Presidente Ferdinand “Bongbong” Marcos Jr.
Ang maong datos giingong gikan sa Social Weather Stations (SWS) survey, apan wala kini nagpakita og petsa kon kanus-a gihimo o gimantala ang survey.
