Ombudsman, nagpadayon sa pag-andam og kaso batok sa pipila ka senador

Gipasalig ni Ombudsman Jesus Crispin “Boying” Remulla nga magpadayon ang Office of the Ombudsman sa pag-andam sa mga posibleng kaso batok sa pipila ka naglingkod nga senador.

Sa press briefing sa Ombudsman, gipangutana si Remulla kabahin sa kahimtang sa imbestigasyon batok kang Senator Chiz Escudero, diin iyang giingon nga nagpadayon gihapon ang fact-finding stage sa maong kaso.

Matud niya, gisusi pa pag-ayo sa ilang opisina ang mga impormasyon ug ebidensya nga ilang nadawat tungod kay dili tanan niini mahimong kasaligan.

May kalabotan ang maong imbestigasyon sa giingong anomalya sa flood control projects nga gisusi sa Ombudsman.

Samtang, giingon usab ni Remulla nga padayon usab ang pag-andam sa kaso batok kang Senator Joel Villanueva.