Gibawi na sa Philippine Institute of Volcanology and Seismology (PHIVOLCS) ang tsunami advisory nga ilang gipagula human sa magnitude 6.5 nga linog nga miigo sa kadagatan sakop sa Balut Island, Davao Occidental.
Sumala sa PHIVOLCS, wala silay natala nga katingad-an nga pagbag-o sa lebel sa tubig-dagat sulod sa tulo ka oras human sa linog. Wala usab sila makadawat og report gikan sa mga apektadong lugar bahin sa dili kasagarang pagsaka o pagkunhod sa tubig-dagat.
Tungod niini, opisyal nang gibawi sa PHIVOLCS ang una nilang tsunami information nga gipagula alang sa mga baybayon sa Sarangani, Davao Occidental, ug General Santos City.
Bisan pa niini, gidasig gihapon sa PHIVOLCS ang publiko nga magpabiling alerto sa posibleng mga aftershock ug padayon nga mosunod sa mga pahimangno ug abiso sa mga lokal nga awtoridad.
