Adunay gamay nga panaglalis sa ika-upat nga adlaw sa impeachment trial ni Vice President Sara Duterte human gikuwestyon sa iyang depensa ang mga petsa nga nakabutang sa pipila ka dokumento sa National Bureau of Investigation o NBI.
Gipunting ni defense counsel Atty. Mark Vinluan ang giingong dili pagtugma sa petsa sa Investigation Data Form nga gisumite sa NBI ngadto sa Department of Justice.
Matud ni Vinluan, adunay dokumento nga adunay petsang Pebrero 11, 2025 apan makita usab nga nadawat kini sa DOJ niadtong Enero 30, 2025, nga mas sayo kaysa petsa nga nakabutang sa dokumento.
Gikuwestyon usab sa depensa ang laing dokumento nga adunay kausaban sa petsa sa pagdawat ug nangayo og katin-awan kabahin niini.
Apan mipasabot si NBI Regional Director Jeremy Lotoc nga wala siya’y ikahatag nga tubag tungod kay dili siya ang personal nga midawat sa maong mga dokumento.
Matud ni Lotoc, ang mga tao nga maoy nagproseso ug naghimo sa mga dokumento ang mas makahatag og klarong tubag.
Samtang, miapil ang House prosecution panel sa pagkontra sa maong linya sa pagpangutana, nga nag-ingon nga wala kini direktang kalabutan sa sentro nga isyu sa impeachment case.
Apan giinsistir sa depensa nga importante nga masuta ang mga kalainan sa dokumento aron masiguro ang transparency ug kredibilidad sa mga ebidensya.
