Natapos na ang unang heat wave nga nasinati sa France human sa halos usa ka semana nga grabeng kainit nga nakaapekto sa nagkalain-laing bahin sa nasod ug sa pipila ka lugar sa Europa.
Sumala ni Anna Samandel, Bombo International Correspondent sa France, lahi ang ilang nasinati nga kainit kumpara sa Pilipinas. Matud pa niya, bisan init usab ang panahon sa Pilipinas, adunay hangin nga makatabang sa pagpamenos sa kainit. Apan sa France, uga ang kainit ug halos walay hangin, hinungdan nga mas makapakapoy ug makaluya ang pagbati.
Bisan og natapos na ang unang heat wave, matud ni Samandel nga gilauman pa ang pag-abot sa ikaduhang heat wave sa umaabot nga mga semana. Tungod niini, daghang mga residente ang nagdali sa pagpalit og mga air conditioner ug uban pang cooling appliances, nga misangpot sa pagdagsa sa mga mamalitay sa pipila ka mga tindahan.
Bisan pa sa ilang nasinati nga grabeng kainit, nagpasalamat si Samandel ug ang ubang mga residente tungod kay anam-anam nang mibalik sa normal ang kahimtang sa panahon samtang nangandam alang sa gilauman nga ikaduhang heat wave
