SARANGANI- Gibutyag ni Cirilo Lagnason, Protected Area Superintendent sa Sarangani Bay Protected Seascape nga naapektuhan ang pipila ka mga beach resort sa Glan, Sarangani tungod sa nahitabong coastal uplift.
Matod ni Lagnason, base sa PHIVOLCS, posible nga permanente na ang coastal uplift sa maong mga lugar.
Apan iyang gipatin-aw nga ang kahimtang sa tubig sa dagat mahimong mausab pa sa paglabay sa panahon, diin posible kining moatras o moabante depende sa natural nga kausaban sa palibot.
Gibutyag usab niya nga ang pipila ka lugar diin miatras ang dagat og mga 200 metros adunay mga dapit nga kalit og kalalom o kantilado ang ilawom sa tubig.
Tungod niini, iyang gipasidaan nga dili kini awtomatikong luwas paliguan ug kinahanglan pa kini og mas lawom nga pagtuon aron masiguro ang kaluwasan sa mga tawo nga mosulod sa maong mga lugar
