Gipadayag sa usa ka restaurant sa Japan ang ilang sekreto sa award-winning nga fried chicken human sila nakadaog og gold medal sa Japan Fried Chicken Grand Prix.
Sumala sa tag-iya sa Wakatori nga si Yoshihiro Tsuchiya, ilang gigamit ang “aged oil” o karaang mantika nga ilang gipadayon sukad pagbukas sa ilang negosyo niadtong 1960.
Matud niya, ang maong pamaagi maoy naghatag sa ilang fried chicken og lahi nga aroma ug timpla nga dili makuha gamit lamang ang bag-ong mantika.
Apan, nakadawat og mga pagsaway ang restaurant human nabalaka ang pipila ka tawo sa social media tungod sa balitang 66 na ka tuig ang ilang mantika.
Gipatin-aw sa Wakatori nga dili nila pasagdan ang kalidad niini tungod kay ilang gilimpyohan ug gisala kada adlaw ang mantika, dayon dugangan og bag-o aron mapadayon ang lami.
Bisan pa niini, mipahimangno ang mga eksperto sa pagkaon nga ang sige og balik-balik nga pagpainit sa mantika mahimong makahimo og mga makadaot nga kemikal nga posibleng peligro sa panglawas.
Matud nila, lahi ang mantika kumpara sa mga sabaw nga dugay nang gipadayon sa ubang restaurant tungod kay mas dako ang risgo sa pagtipon sa makadaot nga ingredints niini .
