Nakab-ot sa ‘skateboarder’ nga taga-Spain ang bag-ong Guinness World Record human makatala og gikusgon nga 94.34 milya matag oras o kapin sa 151 kilometros matag oras atol sa pagpadagan paubos sa dalan sa Canada.
Gikumpirma sa Guinness World Records nga si Diego Poncelet, 27 anyos, maoy nakakab-ot sa rekord alang sa pinakapaspas nga pagpadagan og ‘skateboard’ paubos sa bukid nga nagbarog ang nagsakay.
Nahimo kini sa siradong bahin sa ‘Route des Éboulements’ sa rehiyon sa Charlevoix, Quebec, Canada, diin nahimutang usab ang lugar nga gigamit sa miaging rekord.
Matod ni Poncelet, nakarekord na siya og gikusgon nga 91.27 milya matag oras o kapin sa 146 kilometros matag oras sa iyang unang pagsulay, nga igo na unta aron mabreak ang daang rekord.
Apan mihulat pa siya og lima ka adlaw aron makakuha og mas maayong kondisyon sa panahon ug niadtong Septyembre 22, malampuson niyang nakab-ot ang 94.34 milya matag oras.
Gibutyag usab ni Poncelet nga nahadlok siya sa sinugdanan nga dili niya makab-ot ang iyang tumong nga makaabot sa 93 milya matag oras, apan nalipay pag-ayo siya sa dihang malampuson niyang naabot ang maong gikusgon.
